جنوبی پنجاب سیکرٹریٹ کس شہر میں بنے گا؟

ملتان،لودھراں یا بہاولپور؟حکومت مشکل میں پڑ گئی

لاہور: (قافلہ نیوز) جنوبی پنجاب میں خود مختار سیکرٹریٹ کا قیام حکومت کے لئے بڑا امتحان بن گیا۔ سیکرٹریٹ کس شہر میں بنایا جائے ،پی ٹی آئی مشکل میں پڑ گئی۔ کس کی مانے اور کس کی نہ مانے،جنوبی پنجاب سیکرٹریٹ حکومت کے گلے کی ہڈی بن گیا۔
جنوبی پنجاب میں خود مختار سیکرٹریٹ کس شہر میں بنے گا؟ پی ٹی آئی قیادت کی دھڑے بندی سامنے آگئی۔ سیکرٹریٹ اپنے اپنے علاقوں ملتان، بہاولپور اور لودھراں میں بنوانے کے لیے پی ٹی آئی رہنما سرگرم ہوگئے ہیں۔ وزیراعلیٰ مشکل میں ہیں کہ تینوں شہروں میں سے کہاں پر سیکرٹریٹ بنایا جائے۔
تحریک انصاف کے ذرائع کا کہنا ہے کہ پارٹی کے سینئر رہنما جہانگیر ترین سیکرٹریٹ لودھراں کے علاقے جلاآریاں میں جبکہ اس کا سب سیکرٹریٹ ملتان میں بنوانا چاہتے ہیں۔ وزیرخارجہ شاہ محمود قریشی سیکرٹریٹ ملتان میں بنانے کے خواہاں ہیں۔ جنوبی پنجاب محاذ کے اراکین کی تجویز ہے کہ سیکرٹریٹ بہاولپور میں ہونا چاہیے۔ سیکرٹریٹ کے معاملے پر ایگزیکٹو کونسل اپنی سفارشات وزیراعظم عمران خان کو بھجوائے گی جبکہ وزیر اعلیٰ نے بھی اس مشکل کا حل تلاش کرنے کے لیے تمام تجاویز وزیراعظم کو بھیجنے کا فیصلہ کیا ہے۔
جنوبی پنجاب خود مختار سیکرٹریٹ کے لئے ایگزیکٹو کونسل کا اجلاس بھی آئندہ ہفتے بلوا لیا گیا ہے۔ جنوبی پنجاب ایگزیکٹو کونسل اجلاس میں نئے سیکرٹریٹ کے حوالے سے سفارشات تیار کرے گی۔جنوبی پنجاب سیکرٹریٹ کے معاملے میں دیگر قانونی امور کا جائزہ لیا جائے گا۔ جگہ کا تعین ہونے کے بعد خود مختار سیکرٹریٹ یکم جولائی 2019 سے کام شروع کرے گا۔

Show More

جواب دیں

آپ کا ای میل ایڈریس شائع نہیں کیا جائے گا۔ ضروری خانوں کو * سے نشان زد کیا گیا ہے