کوئٹہ قومی شاہراہ پر ہولناک ٹریفک حادثہ، 13 افراد جاں بحق

ویب ڈیسک :‌پیر03جون 2019
ژوب: کوئٹہ قومی شاہراہ پر خطرناک ٹریفک حادثے میں 13 افراد زندگی کی بازی ہار گئے، جبکہ 7 افراد زخمی بھی ہوئے۔
تفصیلات کے مطابق بلوچستان کے شہر ژوب میں کوئٹہ قومی شاہراہ پر قلعہ سیف اللہ کے قریب ٹرک اور وین میں آپس میں ٹکرا گئی جس کے باعث تیرہ افراد جاں بحق ہوئے۔
پولیس کا کہنا ہے کہ حادثے میں جاں بحق ہونے والے 5افراد کا تعلق ایک ہی خاندان سے ہے، مسافر وین کوئٹہ سے ژوب آرہی تھی۔
ریسکیو ذرائع کے مطابق لاشوں اور زخمیوں کو ڈی ایچ کیو اسپتال قلعہ سیف اللہ منتقل کردیا گیا، جہاں زخمیوں کو فوری طور پر طبی امداد فراہم کی جارہی ہے۔ذرائع کا مزید کہنا ہے کہ پولیس نے جائے حادثہ کو سیل کرکے تحقیقات کا آغاز کردیا ہے، جبکہ حادثے کی اصل وجہ جاننے کے لیے تفتیش کا سلسلہ بھی جاری ہے۔
یاد رہے کہ گذشتہ روز ہی صوبہ پنجاب کے شہر میانوالی میں کار اور ٹریلر کے درمیان تصادم کے نتیجے میں 4 افراد جان کی بازی ہار گئے تھے۔
رواں سال 7 فروری کو خیبرپختونخواہ کے علاقے ضلع کرک میں انڈس ہائی وے پر کار اور مسافر کوچ میں تصادم کے بعد بس میں خوفناک آگ بھڑک اٹھی تھی جس کے نتیجے میں 15 افراد جھلس کر جاں بحق ہوگئے۔واضح رہے کہ 21 جنوری 2019 کو بلوچستان کے ضلع لسبیلہ کی تحصیل بیلہ کراس کے قریب مسافر بس اور ٹرک کے مابین ہونے والے تصادم کے باعث 26 افراد جاں بحق جبکہ17 افراد زخمی ہوگئے تھے۔

Show More

جواب دیں

آپ کا ای میل ایڈریس شائع نہیں کیا جائے گا۔ ضروری خانوں کو * سے نشان زد کیا گیا ہے