کراچی میں ہیٹ ویو کا خطرہ ، ریگستان کی گرم ہوائیں چلنے لگیں

ویب ڈیسک : 21ستمبر 2019
کراچی : چیف میٹرولوجسٹ نے کراچی میں ہیٹ ویو کے خطرے کی گھنٹی بجا دی اور تین سے چار روز تک شدید گرمی کی پیش گوئی کرتے ہوئے کہا شہر میں سمندری ہوائیں بند ہوگئیں ہیں اور ریگستان کی گرم ہوائیں چلنے لگیں، درجہ حرارت چالیس سے اکتالیس ڈگری سینٹی گریڈ تک جانے کا امکان ہے۔
تفصیلات کے مطابق کراچی میں ہیٹ ویو کا خطرہ منڈلانے لگا، محکمہ موسمیات نے شدید گرمی کے اسپیل سے شہریوں کو خبردار کردیا ہے، چیف میٹرو لوجسٹ سردارسرفراز نے کہا سمندری ہوائیں چلنے سے کراچی کا موسم معتدل رہتا ہے، بھارتی گجرات اور ممبئی کے جنوب میں ایک لو پریشر ایریا بنا ہے، ہوا کے کم دباؤ کی وجہ سے کراچی کے ماحول پر دباؤ بڑھ جائے گا۔چیف میٹرولوجسٹ کا کہنا تھا کہ کراچی میں سمندری ہوائیں بند ہوچکی ہیں، ہواؤں کا رخ تبدیل ہو کر شمال مغرب کی طرف ہوگیا ہے اور ریگستان کی گرم ہوا چل رہی ہے۔سردارسرفراز نے مزید کہا کہ کراچی میں 3سے 4 روز موسم گرم رہے گا، سمندری ہوائیں بھی بند رہیں گی ، صبح 11 سے شام 4 بچے تک شدید گرمی پڑے گی، درجہ حرارت 40 سے 41 تک جانے کا امکان ہے ، ہیٹ ویو کے دوران پانی کا استعمال زیادہ کیا جائے۔
محکمہ موسمیات کا کہنا ہے کہ آج بھی موسم گرم اور مرطوب رہے گا، زیادہ سے زیادہ درجہ حرارت 37 ڈگری تک پہنچ سکتا ہے۔شہر کا موجودہ درجہ حرارت 37 سینٹی گریڈ ہے اور ہوا میں نمی کا تناسب 43 فیصد ہے ، حبس بڑھنے سے گرمی کی شدت زیادہ محسوس ہوگی جبکہ ہوا 23 کلومیٹر فی گھنٹہ کی رفتار سے چل رہی ہے۔
سندھ حکومت نےہیٹ ویوسے متعلق الرٹ جاری کردیا ہے اور ڈویژنل کمشنرز اور ذمہ داران کو ہیٹ ویو سے بچاؤ کیلئے تحریری ہدایت بھی جاری کی گئی ہے۔جس میں کہا گیا ہے شہر میں شروع ہونیوالی ممکنہ ہیٹ ویو 21سے24ستمبر تک رہنے کا امکان ہے، الرٹ کے دوران تمام سرکاری اسپتالوں میں 24گھنٹے ایمرجنسی اور صحت کی سہولیات میسر ہوگی، تمام پیرا میڈیکل اسٹاف کی چھٹیاں بھی منسوخ کردی گئی ہے۔
الرٹ کے دوران ہیٹ اسٹروک کے کیسز سے بچنے کیلئے جنریٹرز برف ایئر کنڈیشن اور پانی کی سپلائی کو موثر بنانے کا حکم دیا جبکہ تمام آفیسرز کو 4 بجے تک اپنی رپورٹ ہائی اتھارٹیز کو بھیجنے کی ہدایت کردی ہے۔
کراچی میں گرمی کی شدت کے پیش نظر بلدیہ کراچی نے عباسی شہید اسپتال میں مرکزی ہیٹ اسٹروک سینٹر بھی قائم کردیا ہے۔دوسری جانب کوئٹہ سمیت صوبےکےبیشترعلاقوں میں موسم خشک اورگرم رہنے کا امکان ہے اور درجہ حرارت 35ڈگری تک جاسکتا ہے جبکہ حیدرآباد اورگردونواح میں آج موسم گرم اورخشک رہے گا، زیادہ سے زیادہ درجہ حرارت 41 ڈگری سینٹی گریڈ متوقع ہے۔ادھر جنوبی پنجاب کے اضلاع بھی گرمی کی لپیٹ میں ہیں-

زرعی میدانوں کے لئے رواں ہفتے کی موسمیاتی پیشن گوئی
(19 سے 25 ستمبر 2019)
چاول کی کاشت کے علاقے
پنجاب :
گوجرانوالہ ڈویژن میں بروز جمعرات سے ہفتہ کو اور منگل کے روز چند مقامات پر تیز ہواؤں اور گرج چمک کے ساتھ بارش کا امکان ہے۔ تاہم ہفتے کے باقی دنوں میں بیشتر علاقوں میں موسم خشک اور مرطوب رہیگا۔ ذیادہ سے زیادہ درجہ حرارت : 30 سے 33 ڈگری سینٹی گریڈ
سندھ :
بیشتر علاقوں میں موسم خشک اور مرطوب رہیگا۔ تاہم بروز منگل کو سکھر ڈویژن میں کہیں کہیں گرج چمک کے ساتھ بارش کا امکان ہے۔ ذیادہ سے زیادہ درجہ حرارت : 37 سے 41 ڈگری سینٹی گریڈ
کپاس کی کاشت کے علاقے
پنجاب :
بروز جمعہ اور منگل کو فیصل آباد اور ساہیوال ڈویژن میں کہیں کہیں گرج چمک کے ساتھ بارش کا امکان ہے۔ تاہم ہفتے کے باقی دنوں میں بیشتر علاقوں میں موسم خشک اور مرطوب رہیگا۔ زیادہ سے زیادہ درجہ حرارت : 33 سے 38 ڈگری سینٹی گریڈ
سندھ :
میرپورخاص اور حیدرآباد ڈویژن میں بروز منگل کہیں کہیں تیز ہواؤں اور گرج چمک کے ساتھ بارش کا امکان ہے۔ تاہم ہفتے کے باقی دنوں میں بیشتر علاقوں میں موسم خشک اور مرطوب رہیگا۔ ذیادہ سے زیادہ درجہ حرارت : 35 سے 41 ڈگری سینٹی گریڈ
خطہ پوٹھوہار
راولپنڈی ڈویژن میں جمعرات سے ہفتہ تک اور بروز منگل کہیں کہیں تیز ہواؤں اور گرج چمک کے ساتھ بارش کا امکان ہے۔ زیادہ سے زیادہ درجہ حرارت : 33 سے 38 ڈگری سینٹی گریڈ
وسطی خیبر پختون خواہ
بیشتر علاقوں میں موسم گرم اور مرطوب رہیگا- تاہم پشاور، ہزارہ اور مالاکنڈ ڈویژن میں بروز جمعرات، جمعہ اور منگل کو کہیں کہیں تیز ہواؤں اور گرج چمک کے ساتھ بارش کا امکان ہے۔ ذیادہ سے زیادہ درجہ حرارت : 33 سے 37 ڈگری سینٹی گریڈ
زیریں خیبر پختون خواہ
بیشتر علاقوں میں موسم گرم اور مرطوب رہیگا – تاہم کوہاٹ اور بنوں ڈویژن میں بروز جمعرات اور جمعہ کو کہیں کہیں تیز ہواؤں اور گرج چمک کے ساتھ بارش کا امکان ہے۔ ذیادہ سے زیادہ درجہ حرارت : 33 سے 38 ڈگری سینٹی گریڈ

Show More

جواب دیں

آپ کا ای میل ایڈریس شائع نہیں کیا جائے گا۔ ضروری خانوں کو * سے نشان زد کیا گیا ہے