سری لنکا کا پاکستان کے خلاف ٹی20سریز میں وائٹ واش

سپورٹس ڈیسک|بدھ09اکتوبر2019

لاہور:سری لنکا نے تیسرے ٹی20 میچ میں شاندار کھیل پیش کرتے ہوئے پاکستان کو 13 رنز سے شکست دے کر تین میچوں کی سیریز میں 0-3 سے وائٹ واش کردیا۔
قذافی اسٹیڈیم لاہور میں کھیلے جارہے سیریز کے آخری ٹی20 میچ کا ٹاس سری لنکا کے کپتان داسن شناکا نے جیتا اور پہلے خود بیٹنگ کا فیصلہ کیا جس کے لیے پاکستان ٹیم میں 3 اور سری لنکا نے 5 تبدیلیاں کیں۔

محمد عامر نے 18 رنز پر ہی پاکستان کو پہلی وکٹ دلائی جس کے بعد عماد وسیم نے سمارا وکرما کو 28 رنز پر آؤٹ کردیا۔
محمد عامر نے جلد ہی ایک اور وکٹ دلائی اور 30 کے اسکور پر تیسری وکٹ گرا کر سری لنکا کے لیے مشکلات کھڑی کیں، پریرا نے جارحانہ انداز میں کھیلنے کی کوشش کی لیکن سرفراز احمد اور افتحار احمد کے گٹھ جوڑ نے ان کی اننگز کا خاتمہ کردیا تاہم فرنینڈو نے ٹیم کو اس مشکل سے نکال لیا۔سری لنکا کی ٹیمیں وقفے وقفے سے وکٹیں گنواتی رہی لیکن اوشادا فرنینڈو پاکستانی باؤلرز کے خلاف ڈٹ گئے۔

پہلا میچ کھیلنے والے اوشادا فرنینڈو کی ناقابل شکست 3 چھکوں اور 8 چوکوں سے مزین 78 رنز کی اننگز کی بدولت سری لنکن ٹیم 7 وکٹوں کے نقصان پر 147 رنز بنانے میں کامیاب رہی۔پاکستان کی جانب سے عماد وسیم اور محمد عامر دو، دو وکٹیں لے کر سب سے کامیاب باؤلر رہے۔
لگاتار تیسرے ٹی20 میچ میں ہدف کا تعاقب کرنے والی پاکستانی ٹیم کی اننگز کا آغاز اس مرتبہ مزید بھیانک ثابت ہوا اور پہلی ہی گیند پر فخر زمان بغیر کوئی رن بنائے وکٹ گنوا بیٹھے۔اس موقع پر بابر اعظم کا ساتھ دینے حارث سہیل آئے اور دونوں کھلاڑیوں نے ذمے دارانہ بیٹنگ کرتے ہوئے 76 رنز ی شراکت قائم کی لیکن تیز رفتاری سے رنز نہ کرنے کے سبب درکار رن ریٹ بتدریج بڑھتا رہا۔

بابر اعظم تیسرے ٹی20 میچ میں بھی جدوجہد کرتے نظر آئے اور 32 گیندوں پر صرف ایک چوکے کی مدد سے 27 رنز بنانے کے بعد پویلین لوٹ گئے۔
سیریز کا پہلا میچ کھیلنے والے حارث سہیل نے اپنی نصف سنچری مکمل کی لیکن 50 گیندوں پر 52 رنز بنانے کے بعد ان کی اننگز بھی اختتام کو پہنچی۔
عماد وسیم کو تیز رفتاری سے رنز بنانے کے لیے اوپری نمبروں پر بھیجا گیا لیکن وہ اس مرتبہ کچھ خاص نہ کر سکے اور صرف 3 رنز بنا سکے جبکہ آصف علی بھی ایک ہی رن بنانے میں کامیاب ہوئے۔اس مرحلے پر ٹیم کی امیدیں کپتان سرفراز احمد سے وابستہ تھیں لیکن وہ بھی 16 گیندوں پر 17 رنز بنانے کے بعد ونندو ہسارنگا کا تیسرا شکار بن گئے۔

گزشتہ دونوں میچوں کی طرح اس میچ میں بھی سری لنکن باؤلرز نے کمال لائن اور لینتھ پر باؤلنگ کرتے ہوئے پاکستانی بلے بازوں کو کھل کر کھیلنے کا موقع نہ دیا اور اپنی ٹیم کی فتح میں مرکزی کردار ادا کیا۔
پاکستان کی ٹیم مقررہ اوورز میں 6 وکٹوں کے نقصان پر 134 رنز بنا سکی اور سری لنکا نے میچ میں 13 رنز سے فتح اپنے نام کرنے کے ساتھ ساتھ سیریز میں 0-3 سے کلین سویپ مکمل کر لیا۔

پاکستان کرکٹ ٹیم کے ہیڈکوچ اور چیف سلیکٹر مصباح الحق نے سری لنکا سے ٹی ٹوئنٹی سیریز میں وائٹ واش پر حیرانی کا اظہار کیا ہے۔ٹیم کی شکست کے بعد کپتان سرفراز احمد کے ساتھ پریس کانفرنس کرتے ہوئے مصباح الحق کا کہنا تھا کہ شکست کی ساری ذمہ داری قبول کرتا ہوں لیکن یہ وہی ٹیم ہے جو 4 برس سے کھیل رہی ہے۔انہوں نے کہا کہ میں شکست کی وجوہات سوچ رہا ہوں، صرف دس دن میں نمبر ون ٹیم کو کیا ہوگیا، ہمیں بہت کچھ ٹھیک کرنے کی ضرورت ہے، ایسا کوئی لیگ اسپنر نہیں جس کو ہم نے موقع نہیں دیا ہے، یاسر اور شاداب کے متبادل دستیاب نہیں ہیں۔ایک سوال کے جواب میں چیف سلیکٹر کا کہنا تھا کہ جو مسائل سب کو دکھائی دے رہے ہیں، وہی ہمیں بھی نظر آرہے ہیں، ہم پاور پلے میں بھی اچھا نہیں کھیل رہے، سینئر کھلاڑیوں پر بلاوجہ تنقید اچھی چیز نہیں۔ان کا کہنا تھا کہ سمت واضح تھی لیکن کھلاڑیوں سے بری کارکردگی کے حوالے سے جواب طلب کروں گا۔

Show More

جواب دیں

آپ کا ای میل ایڈریس شائع نہیں کیا جائے گا۔ ضروری خانوں کو * سے نشان زد کیا گیا ہے