الحمرا اکیڈ می میں پینٹنگ، ڈرائنگ اور مجسمہ سازی کی کلاسز جاری

لاہور(قافلہ نیوز)لاہور آرٹس کونسل کے زیر اہتمام الحمرا اکیڈمی آف پرفارمنگ آرٹس،مال اور کلچرل کمپلیکس میں نوجوان طلبہ اور طالبات کو فنون لطیفہ کی تعلیم و تربیت فراہم کی جا رہی ہے۔یہ اپنی نوعیت کا واحد ادارہ ہے جو تکنیکی و فنی طور پر نوجوانوں کو عملی میدان کے تقاضوں کے عین مطابق تیار کر رہا ہے،اکیڈمی کی جدید طرز پر تزئین وآرائش کی گئی ہے۔الحمرا اکیڈ می میں پینٹنگ، ڈرائنگ اور مجسمہ سازی میں سو سے زائد بچے مستفید ہو رہے ہیں۔ایگزیکٹو ڈائریکٹر لاہور آرٹس کونسل الحمرا اطہر علی خان نے اکیڈمی کے دورے کے موقع پر اظہار خیال کرتے ہوئے بتایا کہ ہمارے نوجوان مصوری کے شعبے میں بے پناہ صلاحیتوں کے مالک ہیں، ان کے ٹیلنٹ کو نکھارنے کے لئے الحمرا اکیڈ می آف پرفارمنگ آرٹس اپنا کلیدی کردار ادا کر رہی ہے، یہ اپنی نوعیت کا واحد ادارہ ہے جہاں کا ماحول آرٹ کے فضاء سے لبریز ہے، پینٹنگ، سکلپچر، ڈرائنگ میں نوجوانوں کو ماہر اساتذہ تربیت فراہم کر رہے ہیں۔ انھوں نے بتایا کہ ان نوجوانوں کی صلاحیتوں کو مزید نکھارنے کے لئے باقاعدہ ورکشاپ کا انعقاد بھی کیا جارہا ہے، یہاں سے تربیت یافتہ نوجوان ملک بھر میں اپنے کام کی نمائشوں منعقد کر رہے ہیں۔ انھوں نے مزید کہا کہ الحمراء اکیڈمی آف پرفارمنگ آرٹس فنون کے 12شعبوں میں نوجوانوں کو تعلیم وتربیت فراہم کرنے میں مصروف عمل ہے، ڈرائنگ،ووکل،طبلہ، فلوٹ،گٹار،ڈانس،ہار مونیم، وائلن،ستار،سارنگی،چائلڈ آرٹ،ڈرامہ،کی بورڈ اور مجسمہ سازی میں اعلیٰ صلاحیتوں کے مالک اساتذہ تربیت فراہم کر رہے ہیں،500نوجوان فنون لطیفہ کے 12شعبوں میں تعلیم حاصل کررہے ہیں،روز بہ روز بڑھتی تعداداس ادارے کی اعلیٰ کارکردگی کا منہ بولتا ثبوت ہے،الحمراء اکیڈمی آف پرفارمنگ آرٹس پاکستان کے تاریخی ادارے کے حیثیت اختیار کرچکا ہے،یہ ادارہ جدید تقاضوں کے معیارکے عین مطابق اپنی خدمات سرانجام دے رہا ہے۔علاوہ ازیں الحمرا اکیڈمی آف پرفارمنگ آرٹس ووکل میوزک میں ایڈوانس کلاسز کا اجرا کر چکی ہے جس کے لئے داخلہ جاری ہیں۔

Show More

جواب دیں

آپ کا ای میل ایڈریس شائع نہیں کیا جائے گا۔ ضروری خانوں کو * سے نشان زد کیا گیا ہے